فيلم "Cruella" بيقدم بطريقة درامية جيدة دراسة لأحد اهم شخصيات عالم "ديزني" في الستينيات "كرويلا دو فيل"، وقصة صعودها من كونها إنسانة منبوذة في العالم اللي هيا عايشة فيه للشخصية الشريرة اللي كلنا عارفينها في فيلم الأنيمشن..
الفيلم قدر يقدم تدرج كويس جدا في الأحداث بحيث اننا نتعرف علي حالة شخصية "ستيلا" في البداية كانت ازاي، والتحولات اللي حصلت بعد كده عشان تبقي "كرويلا" وتحقق الغاية المعينة اللي القصة اتبنت عليها.
على مستوى الاتوائات اللي اتقدمت، فممكن يكون الموضوع واضح للناس في البداية وميبقاش مفاجئ ليهم، ولكن شطارة السيناريو أنه عرف يمهد صح للتغيرات اللي حصلت ل"ستيلا"، ومش بس كده زود عليها تفصيلة كمان وصعد القصة حلو جداً في تسلسل النهاية. يمكن بس عيوب الفيلم تتمثل في إنه طويل شوية، وسنة مبالغة في تصميم بعض الشخصيات الفرعية اللي تبان كرتونية إلي حدٍ كبير، باستثناء الاداء التمثيلي ل"إيما ستون" و"إيما تومسون"، واللي عرفوا يعملوا توازن حلو بين الجدية والجنون في تعبيرات الوش وطريقة الأداء. فمقبول جداً ان تجسيد "ايما ستون" يبقي شارب شوية من شخصية "كرويلا" في الانيمشن لان فيه لحظات درامية كويسة بتتقدم برضو بتعزز كتير فرصها في ترشيحات الاوسكار السنة دي مع "أيما تومسون".في النهاية، فيلم "Cruella" صعب قوي تشبيهه بفيلم "Joker" في كل حاجة، يمكن بس الرابط هو طبيعة القصة نفسها، لكن التنفيذ كان مختلف تماماً وبيخلي الفيلم متفرد بذاته مش شبه فيلم تاني..
المصدر : Behind The Scene
